Bolashaq and SDU: building bridges for success

Бүгін «Bolashaq talks» пікірталас алаңында «Болашақ» халықаралық бағдарламасының 27 жылдығына арналған онлайн кездесу өтті.

Кездесудің спикерлері мен модераторы «Болашақ» бағдарламасының серіктесі – Сүлеймен Демирел университетінің басшылығы мен қызметкерлері болды.

Кездесуге «Болашақ» бағдарламасының түлегі, Сүлеймен Демирел университетінің ректоры Қуаныш Ерғалиев, «Болашақ» бағдарламасының түлегі, СДУ-дің аға оқытушысы Айгерім Құсайынқызы және «Болашақ» бағдарламасының түлегі, «Халықаралық бағдарламалар орталығы» АҚ президенті Айнұр Кәрібозова қатысты.

Онлайн жүздесуге «Болашақ» бағдарламасының түлегі, СДУ маркетинг департаментінің директоры Бақыт Аманжолқызы модераторлық етті.

Қуаныш Ерғалиев сөзін Сүлеймен Демирел университетінің тарихынан бастады. Ректордың айтуынша, қазіргі уақытта СДУ-да төрт факультет бар: Педагогика және гуманитарлық ғылымдар факультеті, Инженерлік және жаратылыстану ғылымдары факультеті, Құқық және әлеуметтік ғылымдар факультеті мен Бизнес мектебі. Университетте оқыту үш тілде жүзеге асырылады, оқытудың негізгі тілі ағылшын тілі болып табылады. Яғни, оқытудың 81%-ы ағылшын, 16%-ы қазақ тілінде және 3%-ы орыс тілінде жүргізіледі.

Бүгінгі таңда Сүлеймен Демирел атындағы университетте «Болашақ» бағдарламасының 46 түлегі жұмыс істейді.
Түлектердің ең көп саны магистратура бағдарламасы бойынша – 37 адам, докторантураны – 6 адам, ал бакалавриатты – 3 адам аяқтады.

Сонымен қатар, Қуаныш Ерғалиев «Болашақ» бағдарламасының түлектеріне СДУ-дың ұсынып отырған мүмкіндіктерімен бөлісті. Олар:
– Бәсекеге қабілетті жалақы;
– Кәсіби жетілдіру жұмыстары;
– Басшылық тарапынан қолдау;
– Қолайлы, либералды корпоративтік мәдениет және т. б.

Айнұр Кәрібозова кездесу қатысушыларына «Болашақ» халықаралық стипендиясын тағайындау Ережесіне елеулі өзгеріс енгізілгендігіне тоқталды. Жаңа өзгерістер бағдарламаның ашықтығын және қолжетімділігін нығайтуға, барлық үміткерлер үшін тең мүмкіндіктер жасауға және іріктеудің объективтілігін арттыруға бағытталып отырғандығын айтты.

«Биылдан бастап Халықаралық бағдарламалар орталығында конкурстық рәсімдер толық автоматтандырылып, іріктеу бірыңғай онлайн-платформада жүргізілуде. Үлгі ретінде Президенттік жастар кадрлық резервіне іріктеу жүйесі таңдап алынды. Сондай-ақ, «Болашақ» стипендиясын тағайындаудың конкурстық іріктеу процесіне енгізілген негізгі өзгерістердің бірі – үміткерлерді конкурстық іріктеу кезеңдерін 6-дан 3 турға дейін қысқарту болып табылады», – деп атап өтті Айнұр Кәрібозова.

Өз кезегінде Әйгерім Құсайынқызы СДУ қызметкері ретінде өзінің мүмкіндіктерімен бөлісті. Ол өзінің білімі және тәжірибесімен бөлісу арқылы жастардың келешегінің жарқын болуына және еліміздің білім беру жүйесінің дамуына үлес қосып отырғандығын байқатты.

Кездесу соңында Әйгерім Құсайынқызы «Болашақ» халықаралық бағдарламасын алдағы 27 жылдығымен құттықтап, барлық үміткерлерге байқаудан сәтті өтулерін тіледі.