BOLASHAQ TALKS

 

2020 жылғы 23 қазанда кезекті «Bolashaq talks» пікірталас алаңында «Болашақ» халықаралық стипендиясын тағайындау үшін конкурстық іріктеуді автоматтандыру мәселесі талқыланды.

 

Кездесудің спикерлері ретінде «Серпін» Ұлттық білім беру және инновация палатасының президенті, Мемлекет және қоғам қайраткері Мұрат Әбенов пен ҚР Білім және ғылым министрлігінің «Adal Bilim» сыбайлас жемқорлыққа қарсы іс-қимыл жөніндегі кеңсесінің өкілі Сергей Пен қатысты. «Болашақ» бағдарламасының түлегі Индира Бектенова кездесуге модераторлық етті.

 

«Болашақ» халықаралық стипендиясына үміткерлерді конкурстық іріктеу рәсімдеріне енгізілген негізгі өзгеріс ол – конкурстық іріктеу кезеңдерінің 6-дан 3-ке дейін қысқарту болып табылады. Осы жылдан бастап «Болашақ» бағдарламасының ашықтығын қалыптастыру мақсатында конкурстық іріктеу рәсімі толықтай цифрландырылып, автоматтандырылды. Оған Президенттік жастар кадрлық резервіне іріктеу жүйесі үлгісі ретінде таңдап алынды. Мұндай онлайн формат іріктеу кезеңдеріне бақылауды күшейтуді қамтамасыз ететіндігін атап өткен жөн.

 

«Болашақ» бағдарламасына үміткерлерді конкурстық рәсімдерден өткізуге арналған арнайы онлайн платформаға бастапқы кезде сыни тұрғыдан қарадым. Бірақ, мұның бәрі үлкен жүйе екендігіне кейін көзім жетті. Яғни, үміткер жеке кабинеті арқылы конкурстық іріктеудің барлық кезеңдерінен автоматтандырылған жүйе арқылы өтіп отырады. Сондай-ақ, Тәуелсіз сараптау комиссиясының отырысы бейнежазбаға жазылады. Оның жақсы жері – комияссия мүшесінің сұрағы, әрбір айтқан сөзі сақталады. Бұл комияссия мүшесінің жауапкершілігін арттырады», – деді Мұрат Әбенов.

 

Ол «Болашақ» бағдарламасына үміткерлерді конкурстық рәсімдеу процесін цифрландыру үлкен бастама екенін айтты. «Себебі, Тәуелсіз сараптау комиссиясының мүшелері онлайн қосылатын үміткерлердің кім екенін білмейді, үміткерлер де комиссия мүшелерін білмейді. Комиссия мүшелері де бір-бірімізді танымаймыз. Бұл бағдарламаның ашықтығын және конкурстық комиссияның әділдігін қамтамасыз етеді», – деп атап өтті ол.

 

Мемлекет қайраткері «Болашақ» бағдарламасы ауыл жастары үшін жеңілдіктерді қалдырып, оларға зор мүмкіндік беріп отырғанына ерекше тоқталды. Ол осы мүмкіндікті пайдаланып, ауылды жерлердегі үміткерлерді президенттік стипендияға қатысуға шақырды.